2024 жыл Шығыс Қазақстанда «Жол жылы» болып жарияланды. Осыған байланысты, өңірде жол жөндеу мәселелеріне, әсіресе атқарылатын жұмыстар сапасына айрықша назар аударылмақ.

Биыл бұл мақсатқа 28,5 миллиард теңге бөлу жоспарланып отырғанын, сондай-ақ орташа жөндеумен 600 шақырымға жуық жол қамтылатынын айту керек.

Бұл бағыттағы ірі жобалар қатарына облыс орталығындағы Сәтпаев даңғылы мен Жібек жолы, Базовая көшелерінің, сондай-ақ Пермитин мен Славский жағалауы көшелерінің қиылыстарында орналасқан жол айрығының құрылысын жатқызуға болады. Сонымен бірге, ағымдағы жылы Жібек жолы мен Базовая көшелерін жөндеу жұмыстары аяқталады.

Ал қалаарлық жолдар туралы сөз қозғар болсақ, биыл Қалбатау – Майқапшағай, Талдықорған – Өскемен бағыттарындағы республикалық маңызы бар трассалар мен Осинов асуын қалпына келтіру жұмыстары жалғасын табады.

Жол жылы аясында облыстық маңызға ие 222 км, аудандық маңызға ие 378 км жол жөнделіп, көшелер ретке келтіріледі. Орташа жөндеу жұмыстары негізінен елді мекендер мен туристік аймақтарға жақын жатқан жолдарға жүргізіледі. Бұдан бөлек «Ауыл – ел бесігі» аясында және аудандардың өз қаражаты есебінен де біраз жол қалпына келтірілмек. Қазірдің өзінде ауылдардың ішіндегі көше жолдарын жөндеу қызу жүріп жатыр. Айталық, Күршім ауданының Маралды ауылында 3 км-ден астам көшеге асфальт төселді. Сол сияқты Күршім-Қалжыр, Күршім-Маралды бағытындағы жолдарға да асфальт төселе бастады.

Облыс басшылығы тұрғындар тарапынан жол сапасына қатысты көптеген негізді арыз-шағым келіп түсетінін айтуда. Сынның көбеюіне соңғы алты жыл көлемінде жолдардың толыққанды жөндеу көрмегені де түрткі болған. Осыны ескере келе, биыл облыс басшылығы өңірдегі жолдарды жөндеуге жұмсалатын қаражат мөлшерін екі есеге ұлғайтуды ұйғарған.