Елімізде өтіп жатқан репродуктивтi денсаулық апталығы аясында мамандар жатыр мойны обырын тудыратын адам папиллома вирусына қарсы  вакцинаның маңыздылығы мен вакцинация науқанына дайындық жұмыстары туралы өңірлік коммуникациялар қызметі алаңында өткен брифингте айтып берді, деп хабарлайды Altainews.kz  тілшісі.

Мамандардың келтірген мәліметтеріне сүйенсек,  жыл сайын  Қазақстанда  жатыр мойны обырының екі мыңға жуык  жаңа жағдайы тіркеледі, бір жылда 600-ден астам  қыз-келіншек  осы  патологиядан  көз жұмады.  Елімізде  жатыр мойны обыры  сүт безі обырынан  кейінгі орында тұр. Жатыр мойны обырын тудыратын адам папиллома вирусын емдеудің тиімді әдісі – осы вирусқа қарсы вакцина салдыру екені қазір ғылыми дәлелденген. 

Акушер-гинеколог дәрігердің айтуынша, бүгінде әлемнің 135 елінде ( Австралия, Бельгия, Ұлыбритания, Германия, Дания, Норвегия, Швеция, Финляндия, АҚШ, т.б.) он бес  жылдан бері осы вакцинаны салу қолға алынған.  Нәтижесінде  16-18 жас аралығындағы жастарда АПВ  80 пайызға төмендегені байқалған, Финляндия мен Швецияда  20 жастағы әйелдерде жатыр мойны обырының азайғаны тіркелген. Бұл  вакцинаны  алғашқы рет  2006 жылы қолданған. Әлемде  100 миллионнан астам адамға  егілген,  осы максатта  270 миллионнан астам дозасы  пайдаланылды. 

Биыл қыркүйек айынан бастап Қазақстанда 11 жасар қыз балаларға осы вирусқа қарсы екпе салына бастайды. Вакцина  тіркелген мекенжайындағы емхана мен мектептердегі екпе кабинеттерінде тегін  салынады. Жасөспірім қыздар дәрігердің   тексеруінен  кейін , ата -анасының немесе камкоршыларының  келісімі алынғаннан кейін ғана  егіледі.

Лиза Қасымханованың сөзіне қарағанда, елімізде төрт валентті вакцинаны салу жоспарланған. Қазір оның қанша дозасы алынатыны нақтылануда.