«Барыс» хоккей клубы Қазақстан ұлттық құрамасының шабуылшысы Аркадий Шестаковпен бір жылдық келісімшарт жасасты. Бұл туралы астаналық клубтың баспасөз қызметі мәлімдеді, деп хабарлайды Алтайньюс тілшісі.

Аркадий Шестаков – Өскемен хоккей мектебінің түлегі. Былтырғы маусым 24 жастағы шабуылшы үшін аса сәтті болды деуге толық негіз бар. Шестаков «Торпедо» сапында Жоғары хоккей лигасы аясындағы 51 ойынға қатысып, онда 36 (12 шайба+24 пас) ұпай жинаған. Оның үстіне жерлесіміз ұлттық құрамаға шақырту алып, Нұр-Сұлтан қаласында өткен бірінші дивизион командалары арасындағы Әлем чемпионатында жеңіске жеткен.

Осы еңбегін ескерген «Барыс» клубының басшылығы хоккейшімен 2020 жылдың 30 сәуіріне дейін келісімшарт жасасыпты.

Айта кетейік, осыдан біраз бұрын елордалық клуб сапына Өскемен хоккей мектебінің тағы бір түлегі, 29 жастағы қорғаушы Леонид Метальников ауысқан болатын.