Өткен қыста жылусыз қалған риддерлік тұрғындардың пәтеріне жылу берілді. Бұл – олар үшін үлкен қуаныш.

Апатты жағдайда еңбек еткен барша қызметкерлерге алғыс айту мақсатында Риддерде «Жылу үшін алғыс» челленджі басталды, деп хабарлайды  Altaynews тілшісі.

Қыс бойы болған апатты жағдайлар мен жарылыстардан кейін Риддер жылу электр орталығы өз жұмысын қайта бастады. Осы орайда тұрғындар үш ауысымда аянбай еңбек еткен қызметкерлердің еңбегін елеусіз қалдырмауды шешкен.

Осы мақсатта мектеп оқушылары мен мұғалімдер жалпықалалық челлендж бастады. Олар жылу электр орталығына барып, ата-аналарымен бірлесіп дайындаған түрлі тәтті-дәмділері мен салған суреттерін қызметкерлерге тарту етті.