Семейде мамыр айындағы мерекелік шаралар онлайн режимді өтеді, деп хабарлайды Altaynews тілшісі.

Бұл туралы Мәдениет және тілдерді дамыту бөлімінің басшысы Назерке Аққожина брифинг барысында айтты.

- Ағымдағы жыл мерекелік шараларға бай. Абайдың 175 жылдығының өзіне арналған 20 ірі шара жоспарланған. Ғылыми конференциялар мен конкурстар онлайн-режимде өтеді. Музейлер онлайн форматта экскурсиялар ұйымдастырып, жұмыстарын жалғастыруда. Театрдың көрермендері YouTube-арнасынан "Ғажайып трагедиясы" қойылымының толық нұсқасын көре алады. Қазір "Жас Абай" қойылымының премьерасына дайындық жүріп жатыр, - деді Назерке Аққожина.

Ауқымды шаралар Қазақстан халықтарының бірлігі күні, Отан қорғаушылар күні мен Жеңіс күні мерекелеріне орай да ұйымдастырылмақ. Осы жылы "Мәңгілік полк" акциясы виртуалды форматта өтеді. Семейліктер ата-бабаларының соғыс кезіндегі ерліктері жайлы хикаяларын орталықтандырылған кітапхана жүйесінің сайтында жариялай алады.

27 сәуірден 1 мамырға дейінгі аралықта қалалық Достық үйі әлеуметтік желіде белсенді жұмыс атқарады. Қаланың этно-мәдени орталықтары қызықты мастер-класстар жариялайтын болады.

Мереке күндерінде қала тұрғындары "Semei" телеарнасы арқылы концерттік бағдарламаларды тамашалай алады. Бұл концерттер қалалық Мәдениет үйінің ғимаратында түсірілуде.