Өскемендегі Жібек жол, 9 мекен-жайы бойынша орналасқан жаңа үйдің тұрғындары пәтерлердің сапасын айтып, шағымданды, деп хабарлайды Altaynews тілшісі.

Жаңа баспанаға тұрғындар екі ай бұрын ғана қоныстанған. Сол кезде мердігер құрылыс мекемесі бұл үйдің мақтауын өткізген екен. Элиталық пәтер алып, қуаныштары қойнына сыймаған тұрғындар енді үйдің сапасын сынға алып отыр.

Өз шағымдарын олар әлеуметтік желіде жазып, облыс әкімі Даниал Ахметовке үндеу жариялады.

Айтуларынша, әйнектелген лоджия мен терезелерде үңіреуген саңылаулар, қабырғалары жұп-жұқа, оған қоса, арзан есіктер мен арзан сантехника орнатылған. Қоныстанғаннан кейін тұрғындар пәтерлеріндегі сантехника жарамсыз болғандықтан, ауыстыруға мәжбүр болыпты. 10 қабатты үйде лифтінің де қосылатын түрі жоқ. Тіпті, аулаға қоқыс тастайтын контейнерлер де қойылмаған.

- Әсіресе, үйдегі судың сапасы туралы ерекше айтып өту қажет. Тат басқан, жағымсыз иісі бар суды пайдаланып отырмыз. Онымен қоймай, бұл ауданды да, мына үйді де элиталыққа жатқызады, - деп жазады тұрғындар.