ШҚО тұрғындарының «Қазпошта» арқылы алғызған заттарының 80%-ы Қытай мен AliExpress, Joom сынды интернет-магазиндерден келген, деп хабарлайды Аltaynews тілшісі ustinka.kz сайтына сілтеме беріп.

«Қазпошта» қызметкерлерінің айтуынша, қазір «Құрметтім менің, қалың жақсы ма? Ауа райы қалай?» деген сыңайдағы хаттар жазылмайды. Көбіне екі ортады заңды тұлғалардың құжаттары мен хабарлары жүреді. Поштаға биыл келген хаттар, былтырғы хаттардан 40,5 мың аз. Алғашқы тоғыз айда шығысқазақстандықтар 516 350 хат жолдап, 521 119 хат алған.

Қазіргі уақытта хат пен қағаздан гөрі, сәлемдеме көп жолданады.

– ШҚО тұрғындарының «Қазпошта» арқылы алдырған заттарының 80%-ы Қытай мен AliExpress, Joom сынды интернет-магазиндерден келген. Шағын пакеттегі заттар – 155,5 мың, ал ірі заттар – 43,6 мың, – делінген «Қазпоштаның» ШҚО-дағы филиалының ақпаратында.

Сондай-ақ жерлестеріміз 25,6 мың жедел жеткізіп беру қызметін пайдаланыпты. Бірақ бұл былтырғыдан екі есе аз.