Шығыс Қазақстан облысының әкімі Даниал Ахметов бүгін АҚШ-тағы кәсіпқой бокс алаңында атой салған шығысқазақстандық спортшы Мейірім Нұрсұлтановты жеңісімен құттықтап,жеделхат жолдады,- деп хабарлайды Алтайньюс тілшісі. 

"Сізді бүгінгі жеңісіңізбен шын жүректен құттықтаймын!

Орта салмақтағы WBC (USNBC) чемпионы мәртебесін асқақ абыроймен қорғап шықтыңыз. Кәсіпқой бокстағы өнеріңіздің әр қадамын бақылап отырған Шығыс жұртының өзіңізге артқан зор сенімін ақтадыңыз.

 Күллі Қазақстан елінің мақтанышына айналған ағайындылар – Әлем чемпионы Мерей Ақшалов пен Мейірім Нұрсұлтановтың дара жолы жас ұрпаққа үлгі-өнеге деп зор сеніммен айтамын!

 Зор денсаулық, мол бақыт, отбасыңызға береке-бірлік, спорттағы жаңа белестерді бағындыруда толағай табыс тілеймін! әрқашан егемен еліміздің көк байрағын асқақтатып, жарқын жеңістеріңізбен қуанта беріңіз!",-деп жазылған жеделхатта.

Естеріңізге сала кетейік, Қазақстандық боксшы Мейірім Нұрсұлтанов АҚШ-тың Лас-Вегас қаласындағы бокс кешінде кезекті жеңісіне жетті. Оның мексикалық қарсыласы Кристиан Оливас отандасымыздан ұпай бойынша жеңілді. Олар WBC тұжырымы бойынша орта салмақтағы АҚШ чемпионы белбеуі үшін жұдырықтасты. Белбеуді кәсіби бокста 13-ші рет жеңіске жеткен Нұрсұлтанов алды. Ал Оливас үшін бұл спорттық карьерасындағы алтыншы жеңіліс.