Шығыс Қазақстан облысының кәсіпкерлер палатасы «Жас кәсіпкер» бағдарламасы бойынша тегін оқытуға қала және аудан  тұрғындарын жинайды. Бағдарлама ауыл тұрғындарын кәсіпкерлікке оқытуға бағытталған, деп хабарлайды Алтайньюс тілшісі.

– Оқуға қабылдау әр аудан, әр қаладағы жұмыспен қамту орталығында жүргізіліп жатыр. Оқуға NEET категориясындағы жастар (29 жасқа дейін), жас отбасы мүшелері, аз қамтылған көпбалалы отбасы мүшелері, аз қамтылған еңбекке қабілетті мүгедектерді шақырамыз, – делінген кәсіпкерлер палатасының хабарламасында.

Бағдарламаға қатысу үшін тестілеуден өту керек, соның қорытындысы бойынша топқа іріктеу жүргізіледі. Қызығушылық танытқандар Өңірлік кәсіпкерлер палатасының қалалық, аудандық филиалдарына, тұрғындарды жұмыспен қамту орталықтарына, ауылдық округ немесе елдімекен, қала әкімдігіне жүгіне алады. Сонымен бірге өтініш пен сауалнама толтырады. Өзімен бірге жеке куәліктің көшірмесі; мекен-жай анықтамасы; өтініш; үлгіге сәйкес толтырылған сауалнама парақшасы болуы керек.

Оқу ұзақтығы – 3 апта. Бірінші кезең бойынша тестілеу 2019 жылғы 22-23 шілде аралығында өтеді. 

Оқу 2019 жылғы  24 шілде – 09 тамыз аралығында жүргізіледі.

Бағдарламаға қатысушыларға шәкіртақы төленеді және курс бітірушілеріне сертификаттар беріледі.

Сұрақтар туындаған жағдайда Кәсіпкерлер палатасының аудан және қала бойынша филиалдарынан кеңес алуға болады.  Оқытуға тіркелу аудан және қалалық жұмыспен қамту орталықтарында жүргізіледі.