Мұндай мүмкіндікке отандасымыз, халықаралық SAT емтиханын сәтті тапсырғаннан кейін қол жеткізді. Дәлірек айтқанда, 1410 балды жинаған қандасымызды Америкадағы бірнеше маңдайалды жоғары оқу орындары өздеріне шақыртқан. Оның қатарында АҚШ-тың 39–шы президенті Джимми Картер, Панама Республикасының президенті Хуан Карлос Варела Родригес, сондай-ақ белгілі астроном,  NASA агенттігінің директоры Ричард Трули сынды тұлғалар тәмамдағанДжорджия технология институты да бар.

 Айжан Нұрманова – АҚШ-тың Калифорния штаты, Сакраменто қаласындағы Choices charter scholl білім мекемесінде оқып жатқан қазақстандық жеткіншек. Бұл мектепке ол Семей қаласындағы физика-математика бағытындағы Назарбаев Зияткерлік мектебінен  ауысып барған. 12 сыныпта оқитын жерлесіміз жуырда туған жеріне келіп, жақындарымен қауышкан еді. Мұхиттың арғы жағындағы өмірі жайлы Айжан былай деп сабақтады:

 - Америкаға отбасымызбен қоныс аудардық. Әке –шешем спортпен кәсіби түрде айналысатын адамдар. Ұзақ жылдар шәкірт тәрбиелеумен келеді. Жетістіктері де аз емес. Міне осының арқасында, олар мұхиттың арғы жағындағы алып мемлекетпен келісімшарт арқылы еңбек етуге бел буды. Ағымдағы оқу жылының алғашқы тоқсаны аяқталысымен менде жолға шығып, жоғарыда аталған мектепке қабылданып, оқуымды жалғастырдым. Сакраменто – көп ұлтты қала болғандықтан, мектепте де түрлі ұлт өкілдерінің балалары білім алады. Мектептің тағы бір ерекшелігі – қашықтан оқуға да болады. Мен осы артықшылықты таңдап, туған қалама қайтып келуге мүмкіндік алдым, - дейді Айжан Серікқызы.  

 Құрама штатта болған аз уақыттың ішінде Айжан өзінің алғырлығын дәлелдей білді. Алдымен мектепте білім деңгейі жағынан рейтингісін жоғарылатып, кейіннен халықаралық SAT емтиханын сәтті тапсырып 1410 балл жинайды. Нәтижесінде Америкадағы алдыңғы қатарлы жоғары оқу орындарының шақыртуына ие болды. 

 -Емтихан қорытындысы бойынша жинаған ұпайым  (Georgia Institute of Technology) Джорджия технология институты, (University of California, Santa Barbara) Санта-Барбарадағы Калифорния университеті,  (University of California, Davis, UC Davis) Дейвис қаласындағы Калифорния университеті сынды белді әрі беделді оқу орындарының студенті атануға мүмкіндік береді. Енді менің алдымда осы  үшеуінің ішінен біреуін таңдау құқы тұр. Оны асықпай ойланып, оңтайлы шешім қабылдармын, - деді Шығыс Қазақстанның тумасы.

 Айжан Семейдегі достары әрі ұстаздарымен арадағы байланысты үзген жоқ. Қажет уақытында жергілікті мұғалімдерден пәндік сабақтарға байланысты түрлі ақыл-кеңестерін алып тұрады. Ол өз болашағын компьютерлік инженерия саласына арнауды жөн көріпті. Өйткені Шығыстың тумасы, бүгінгі технологиялық прогрестің авангардистері Илон Маск, Джефф Безос және Джек Ма секілді әлемдік өркениетке өз үлесін қосуды мақсат тұтып отыр.