24 жастағы қала тұрғыны өз-өзіне қол салмақ болған екен. Оны полиция қызметкері құтқарып қалды, деп хабарлайды Алтайньюс тілшісі.

Оқиға 9 наурыз күні болды. 102 жедел желісіне көпқабатты үйдің терезесінен секіргелі тұрған ер адам туралы хабар түседі. Оқиға орнына жедел-тергеу тобының құрамында тергеуші Сағыныш Сәбиқанов пен полиция қызметкері Қанат Дәуітханов келеді.

Олар пәтерді анықтап, 8 қабатқа көтеріледі. Ер адам терезенің сыртқы жағына шығып алып, секіруге талпынып тұрған. Маңаындағы адамдардың сөзіне құлақ аспай тұрған жігітті тергеуші Сағыныш Сәбиқанов әңгімеге тартып, оның назарын өзіне аудартады. Екеуінің арасындағы бір сағатқа созылған диалог сәтті аяқталып, полиция қызметкері ер адамды райынан қайтарыпты. Оған оқиға орнында бірден медициналық және психологиялық көмек көрсетіледі.

Қазір ер адамның мұндай қадамға не себепті барғаны анықталуда.