«7-20-25» бағдарламасы бойынша баспаналы болғысы келетіндер көп. Алайда барлығының бірдей өтініші мақұлдана бермейді. Неліктен? Анығын Алтайньюс тілшісі хабарлайды.

Өтініші мақұлданбағандар – барлық қарыз алушылардың 4/1 бөлігін құрайды. Мәселен 28 ақпандағы жағдай бойынша, банктер 7 967 өтінімді қарастырып, оның ішінде 5 816-сын мақұлдап, 2 151-інен бас тартқан. Бұл реттегі ең төменгі көрсеткіш – Павлодар облысында, өтінімдердің 40% мақұлданбаған. Одан кейінгі орындарда Жамбыл облысы, (34%), Алматы облысы (33%) және Шымкент (32%).

Ал керісінше, мақұлданбаған өтінімдердің ең аз үлесі Қостанай (18 %) және Ақмола (20 %) өңірлері мен Астана қаласында (22%) байқалады. Төртінші сатыда Шығыс Қазақстан тұр, 22 %.
«Баспана ипотекалық ұйымы» АҚ сыртқы коммуникациялар қызметі басшысының орынбасары Айбар Олжаевтың айтуынша, банктердің несие беруден бас тартуының бірнеше себебі бар:
– Біріншіден, өтінішті қабылдау кезінде Банк, қарыз алушы бағдарламаның шарттарына сай келетін-келмейтіндігін қарайды (тұрғын үйдің және басқа да ипотекалық кредиттердің болмауы, ресми табыстың болуы және т.б.) Бұдан әрі, егер банк өтінімді қабылдаса, шешім екі негізгі факторға байланысты шығарылады: төлем қабілеттілігі және кредиттік тарих. Өтінімді қабылдаудан бас тартудың негізгі себептері — нашар несие тарихы (34 %) және төмен төлем қабілеттілігі (31 %).

Олжаевтің айтуынша банктердің өтініштен бас тарутына негізгі себеп – нашар кредиттік тарих. Алайда бұл жағдайды да түзетуге болады екен.

«Қолжетімді құқық» заңгерлер қауымдастығының басқарма төрағасы Рүстем Қаби мынандай кеңес береді:

– Ірі несие алу үшін, алдын ала бірнеше шағын, ақшалай немесе заттай несие алыңыз. Алыңыз да, бұдан әрі міндеттемелерді мұқият орындаңыз. Сол кезде несие тарихыңыз жақсарады.