Облыс орталығындағы Спорт сарайында жаңа жылдық хоккей матчы болады.

Өскемен қаласының құрама командасы белгілі «Торпедоның» шеберлерімен күш сынасып көреді, деп хабарлайды Altaynews тілшісі.

Қала атынан сынға түсетін команданың сапында әкім Жақсылық Омар, ШҚО Түнгі хоккей лигасының өкілдері және «Торпедо» мен Қазақстан құрмасының бұрынғы жұлдызды ойыншылары болады. Айталық, Талғат Жайлауов, Константин Пушкарёв, Максим Худяков, Евгений Фадеев, Вадим Рифель, Андрей Огородников, Сергей Мирошниченко және Евгений Мазунин.

«Бұл матчты, ең бірінші, жанкүйерлерге мерекелік көңіл күй сыйлау үшін ұйымдастырып жатырмыз. Сондай-ақ ірі додаларда қаламыздың атын шығарып, мерейін асқақтатып жүрген «Торпедо» ойыншыларына қолдау көрсеткіміз келеді. Бізде талай жұлдызды ойыншыны түлеткен хоккей мектебі бар екенін білесіздер. Мерекелік матчта ардагерлермен иық тірестіріп ойнайтын жас хоккейшілер осыны сезінсе деген тілегіміз бар», - дейді ШҚО Түнгі хоккей лигасының өкілі Ерлан Можанов.

Матч 27 желтоқсан күні сағат 19:00-де басталады. Үзіліс кезінде мұз айдында мәнерлеп сырғанаушылар өнер көрсетеді және хоккей фристайлы болады. Ойын аяқталған соң көрермендер айдынға шығып, аңыз ойыншылардан автограф алып, суретке түсу мүмкіндігіне ие болады.