Шығыс Қазақстан облысына жұмыс сапарымен келген Сауда министрі Шемонаиха ауданына ат басын бұрып, «Рулиха» ЖШС сүт-тауарлы фермасының жұмысымен танысты,  деп хабарлайды Алтайньюс тілшісі.

Бұл фермаға 2020 жылдан бері голштейн-фриз тұқымы саналатын 600 ірі қара әкелінген. Қазір тәулігіне он екі тонна сүт өндіріледі. Мың басқа арналған сиыр сауу цехы тұтас заманауи құрылғымен жабдықталыпты.

– Израильдік «Afimilk» фирмасының жабыдықтары сүт өндірісінің көлемін арттырды. Бір сиыр күніне 30-50 литр сүт береді.  Алайда бұл ірі қара тұқымы өрісте жайылмайды. Күтіміне біршама күш жұмсау қажет. Сондықтан Украинадан тәжірибелі екі маман алдырдық, – дейді «Рулиха» ЖШС директоры Серік Сағындықов.

Шетелдік мамандар келгелі өндіріс көлемі ұлғайған, әрі олар өз білгенін жергілікті жұмысшыларға үйрететін көрінеді.

– Әріптестер арасында курс өткіземін. Фермада біртіндеп кәсби ұжым қалыптасып келеді. Ең бастысы Шығыста сүтке сұраныс мол, кәсіпорындар арасында бәсекелестік те жоғары. Бұл баға мен сапаның тұрақты болуына ықпал еді, – дейді Василий Кузьмин есімді азамат.

Өндірісі өрге жүзген кәсіпорынға мемлекет тарапынан да мықты қолдау көрсетілгенін айта кетуіміз керек. Әуелде бұл іске 2,7 миллиард теңге жұмсалса, оның 410 миллион теңгесі – жеке кәсіпкердің қаражаты. Қалған соманы аграрлық несие корпорациясы жеңілдікті несие ретінде берген.

«Пайыздық мөлшерлеме 16 пайыз десек, оның он пайызын мемлекет субсидиялайды, қалған алты пайызды өзіміз төлейміз, - дейді Серік Сағандықов.

«Рулиха» ЖШС-ның басшылығы өндіріс көлемі ұлғая берсе, өңір жұртшылығы тұтынуға қауқарсыз болып қала ма деген қауіп бар екенін жасырмады. Алайда министр Үкіметтің ел аумағында интеграция саясатын жетілдіруге мүдделі екенін айтты.  

– Ең алдымен отандық өніммен өз елімізді тұтас қамтуға тиіспіз. Кәсіпкерлге сол үшін де көп қолдау көрсетеміз. Министрліктің соңғы кездегі қабылдаған шаралары түгел ішкі нарықты нығайтуға бағытталған, – деді Серік Жұманғарин.

Сауда министрі Шемонаиха қаласында жұртшылықпен және бизнес қауымдастығымен кездесу өткізді. Өткір мәселе көтергендерді жеке қабылдап, бірқатар жұмысты жолға қойды.