Елімізде шетелдік тіркеуде болған автокөліктерді заңдастыру жұмысы қарқынды түрде жүріп жатыр. Жалпы республика бойынша 23 қаңтардан бастап 70 мың көлік Қазақстан нөмірін алған.

Қазіргі таңда өңірде ресейлік және армяндық тіркеуде болған 1372 автокөлік заңдастырылған, деп хабарлайды  Altaynews тілшісі.

Мемлекет басшысы Қасым-Жомарт Тоқаев «Әділетті мемлекет. Біртұтас ұлт. Берекелі қоғам» атты Қазақстан халқына жолдауында 1 қыркүйекке дейін елге әкелінген шетелдік автомобильдерді заңдастыруды тапсырған болатын.

Шетелдік есептегі көліктерді тіркеу науқаны 23 қаңтар күні басталған. Десе де, бастапқыда кейбір көлік иелері қиындықтарға тап болған, ал қазір заңдастыру жұмыстары штаттық режимде жүргізіліп жатқан көрінеді.

Сонымен қатар, Ішкі істер министрлігі елге қосалқы бөлшектер ретінде әкелінген автомобильдерді заңдастыру шарттарын айқындайтын Үкімет қаулысының жобасын әзірледі. 

Айта кету керек, заңдастырылған көліктерің басым бөлігі Ресей Федерациясынан әкелінген.