Бүгін еліміз бойынша ЖОО-да білім беру гранттарының конкурсына қатысу үшін өтініштер қабылдау басталды.

Қабылдау 20 шілдеге дейін жалғасады. Айта кету керек, талапкерлер өтінішін онлайн да, офлайн да тапсыра алады, деп хабарлайды Altaynews тілшісі Zakon.kz сайтына сілтеме жасап.

Биыл құжаттарды қабылдау еGov арқылы онлайн форматта немесе ЖОО-лардың қабылдау комиссиялары арқылы офлайн форматта жүзеге асырылады. Сонымен бірге ЖОО-да виртуалды қабылдау комиссиясы жұмыс істейді. Құжаттар қабылдауды кез келген ЖОО (орналасқан жері бойынша) арқылы жүзеге асыруға болады.

Отандық ЖОО-ларға оқуға түсу үшін талапкерлер жеке куәлік, ҰБТ сертификатын; 3х4 көлеміндегі фото, орта білім туралы аттестат (техникалық және кәсіптік білім беру (ТжКБ) ұйымдарының түлектері үшін диплом), №075/у нысанындағы медициналық анықтама, ер жігіттер үшін әскери тіркелу куәлігін тапсыру керек. Сонымен қатар жеңілдетілген санат бойынша конкурсқа қатысу үшін растайтын құжаттар ұсынылады.

Білім беру гранты иегерлерінің тізімі 10 тамызға дейін жарияланады.