ШҚО-да әлі де төтенше өрт қаупі сақталады. Қазіргі күні ТЖД аумақтық бөлімшелері жоғары дайындық режимінде. Дағдарыс орталығында жедел штаб жұмыс істейді.

Бұл туралы Өңірлік коммуникациялар қызметі алаңында өткен баспасөз конференциясында ШҚО ТЖД мамандары мәлімдеді, деп хабарлайды Altaynews тілшісі.

ТЖД мамандарының айтуыша, өрт қауіпсіздігін қамтамасыз ету мақсатында өңірде Азаматтық қорғаныс күштері, жергілікті полиция қызметі, орман мекемелері және ЖАО қатарынан 270-тен астам адамнан тұратын 46 бірлескен мобильді топ құрылған. Мобильді топтар жүргізген профилактиканың арқасында 973 рейдтік іс-шаралар шеңберінде өрт қауіпсіздігі ережелерін бұзған 56 жағдай анықталды. Ескерту түрінде әкімшілік жауапкершілікке 29 адам және айыппұл түрінде 27 азамат тартылды.

Естеріңізге сала кетейік, бұған дейін ШҚО-да биыл өткен жылдың осы кезеңімен салыстырғанда орман өртінің саны артқанын хабарлаған болатынбыз.

ШҚО ТЖД азаматтардан өрт қауіпсіздігі ережелерін қатаң сақтауды сұрайды.

Өрт анықталған жағдайда дереу 101 және 112 арнасына хабар беріңіз.