«Шығыс» өңірлік қолбасшылығына қарасты 27943 әскери бөлімінде Қазақстан Республикасы мен Пәкістан Ислам Республикасы қарулы күштерінің арнайы мақсаттағы бөлімшелері арасында бірлескен тактикалық арнайы оқу-жаттығуы өтті.

Оқу-жаттығуы барысында Қазақстан тарапынан «Шығыс» өңірлік қолбасшылығының бөлімшелері жұмылдырылды, деп хабарлайды Altaynews тілшісі.

Пәкістан Ислам Республикасынан келген әскерилер алдымен тактикалық арнайы оқу-жаттығуы өтетін 27943 әскери бөлімінің полигонымен танысты. Кейін өздеріне бекітілген қару-жарақты, техникаларды сайлап, негізгі бөлімге дайындық жүргізді.

Оқу-жаттығу бірнеше кезеңнен құралған. Атап айтқанда, жеке дара дайындық, топтардың үйлесуі және бірлескен оқу-жаттығудың өткізілуі. Оқу-жаттығуға екі елдің 40-тан астам әскери қызметшісі, 20 бірлік әскери және арнайы техника тартылды.

Әскери бөлімнің полигонында өткен оқу-жаттығу барысында әскери контингенттер үйлесімділік пен өзара іс-қимыл мәселелерін пысықтады, бірлескен арнайы операцияны жүргізді. Содан кейін тікелей барлау-жауынгерлік іс-қимылдарға кірісті.

Бұл оқу-жаттығулар бірлесе тәжірибе алмасуға, білім мен дағдыны шыңдауға, ең бастысы, пәкістан-қазақ әскери қызметшілерінің өзара ынтымағы мен достығын нығайтуға бағытталған.

Тактикалық арнайы оқу-жаттығу жоғарғы деңгейде өтті.