Шығыс Қазақстанда облыстық мәслихат депутаттары әкім сайлауы өтетін аудандар ретінде Глубокое және Алтай аудандарын белгілеген болатын. Қазір сайлау учаскелері жұмысқа дайын.

«Глубокое ауданында әкім болуға кандидат ретінде 3 адам, Алтай ауданында 2 адам тіркелген. Учаскелік және аумақтық комиссиялардың құрамы бекітіліп, жарияланды. Халықты кеңінен ақпараттандыру үшін сайлау комиссияларының мүшелері дауыс беру уақыты мен орнын көрсетілген шақыру қағаздарын таратты, теледидар мен радиодан бейнероликтер мен аудиороликтер жарияланды, әлеуметтік желілерге сайлаудың өтетіні туралы мәліметтер орналастырылды. Әрбір сайлау учаскесінде кандидаттар туралы ақпараттық плакаттар жабыстырылған», - деп хабарлады ШҚО әкімдігінен.

Халықты сайлау учаскелері туралы ақпараттандыру үшін аудандардағы әкімдіктер жанында екі сall-орталық жұмыс істеп тұр.

Сонымен қатар учаскеге тіркелудің дұрыстығын «Электронды қызметтер орталығы» порталының «Өз сайлау учаскеңді тап» сервисі және «Digital East» мобильді қосымшасы арқылы тексеруге болады.

«Алдағы сайлау туралы тұрғындар СМС арқылы да құлақтандырылуда. 1 мыңнан астам сайлаушы тұратын 27 учаскеде азаматтардың тіркелу орны бойынша мәліметтерін тексеру үшін онлайн сервистер орнатылады», - делінген ақпаратта.