Ел жастарына әскери қызметті насихаттау мақсатында ШҚО-да қоғамдық көліктердің сырты әрленіп, патриоттық жарнама жапсырылды. Өскемендегі автобустардың сыртында Қарулы Күштердің логотипі мен «Теңіз шебі сенімді қолда» деген жазу пайда болды, деп хабарлайды Altaynews.kz тілшісі.

Бұндай шара ШҚО-да бұған дейін де өткен болатын. Хакім Абайдың 175 жылдығы аясында трамвайлардың сырты дәл осылай безендірілген еді. Шығыс Қазақстан облысы қоғамдық даму басқармасы мен Қорғаныс істері жөніндегі департаменті бірлесе атқарған жұмыстың негізгі мақсаты еліміздегі сарбаздардың имиджін көтеруге бағытталған.

– Жастар мен тұрғындар арасында әскери қызметті дәріптеудің маңызы зор. Осы ретте қоғамық көліктердің сыртына баннерлер жапсырылды. Жолаушы тасымалдайтын көліктеріміз жаңа жазбалармен жұмысын жалғастырып, шарамыз сәтімен өтті, – дейді ШҚО Қорғаныс істері жөніндегі департамент бастығының орынбасары Жасұлан Асылбекұлы.

Сондай-ақ бұл шара алдағы уақытта да жалғасын таппақ.

– Келер жылы да қалалық маршруттар қамтылмақ. Қоғамдық жұмыстың мақсаты жастардың патриоттық сезімін оятуға бағытталған. Алдағы уақытта да дәл осыындай тақырыптық безендірулер болады, – дейді Облыстық Жастар ресурстық орталығының директоры Айдос Әділбеков.