ШҚО бойынша Мемлекеттік кірістер департаментінде 2024 жылы мобильді аударым ережелері туралы айтылды, деп хабарлайды Altaynews.kz. тілшісі.

Оның айтуынша, соңғы жылдары Қазақстанда қолма-қол ақшасыз төлемдер саны қарқынды өсуде. Мәселен, 2023 жылдың қорытындысы бойынша республикада жасалған барлық мәмілелер мен сатып алулардың 86%-ы қолма-қол ақшасыз есеп айырысу арқылы жасалған.

Бұл ретте қазақстандықтарды өз туыстарының, балаларының, достарының немесе таныстарының шоттарына аударымдар жасай отырып, мобильді аударымдардың мүмкіндіктерін жеке мақсатта пайдалануда ешкім шектемейді.

Айта кетейік, 2024 жылдың басынан бастап республикада, оның ішінде ШҚО аумағында кәсіпкерлердің банктік карталар немесе QR-код арқылы төлем қабылдаудан жаппай бас тартып, клиенттерден ақшалай қолма-қол есеп айырысуды талап ететіндігі байқалады. Көбінесе мұндай талапты такси жүргізушілері, шағын дүкендердің иелері мен шағын бизнестің басқа салаларының өкілдері қояды.

«ҚР «Төлемдер және төлем жүйелері туралы» Заңының 25-бабына сәйкес төлемнің түрлі тәсілдері-банк картасымен, QR-төлеммен немесе қолма-қол ақшамен төлеу көзделген. Қолма - қол ақшасыз төлемдерді қабылдаудан бас тарту заңсыз болып саналады және тұтынушылардың құқықтарын бұзады», - деп нақтылады ШҚО бойынша Мемлекеттік кірістер департаментінің өкілі.

Кәсіпкерлердің төлем карточкасы арқылы төлем қабылдаудан бас тартқаны үшін әкімшілік жауапкершілік көзделген. ӘҚБтК-нің 194-бабына сәйкес, бірінші рет бұзушыға ескерту жазылады, қайталап бұзған жағдайда – 147 680 теңге (40 АЕК) мөлшерінде айыппұл салынады.

Такси жүргізушілеріне келетін болсақ, Гүлмира Сабралимова оларға жеке кәсіпкер ретінде тіркелуге кеңес берді. Мұны e- Salyq Business, Egov Mobile мобильді қосымшалары және кейбір екінші деңгейлі банктер арқылы жасауға болады.