Зейнеткерлікке 2018 жылғы 1 қаңтардан кейін шыққан зейнеткерлерге БЖЗҚ-дан берілетін төлем мөлшері жаңа жылдан бастап 5%-ға артты, - деп хабарлайды Altaynews.kz тілшісі. 

Зейнетақы қорынан берілетін төлемдер  Зейнетақы төлемдерінің мөлшерін есептеуді жүзеге асыру әдістемесіне сәйкес жүзеге асырылады.
-Төлем әдістемесіне сәйкес, бірінші жылы зейнеткердің қордағы жинақтарының сомасы зейнетақы жинақтарының төлем мөлшерлемесі -  6,5%-ға көбейтіліп, 12-ге бөлінеді. Ал мерзімсіз уақытқа белгіленген 1 немесе 2 топтағы мүгедектігі бар адамдар, сондай-ақ зиянды және қауіпті өндірістерде жұмыс істеп, кемінде алпыс ай міндетті кәсіптік зейнетақы жарналары есебінен қалыптастырылған зейнетақы жинақтары бар адамдар үшін Әдістемеде ай сайынғы зейнетақы төлемінің мөлшерін арттыратын түзету коэффициенттерін қолдану көзделген. Осы санаттарға жататын зейнеткерлерге ең үлкен мәнге ие түзету коэффициенті қолданылады, - деп түсіндірді БЖЗҚ облыстық филиалының бөлім басшысы Мадина Жүнісова.
Бөлім басшысының айтуынша, қордан берілетін ай сайынғы зейнетақы төлемі тиісті қаржы жылына белгіленген ең төменгі күнкөріс деңгейінің кемінде 70% мөлшерінде жүзеге асырылады. Осылайша, жыл басынан бері БЖЗҚ-дан берілетін ең төменгі төлем мөлшері 30 384,9 теңгені (70% * 43 407 теңге) құрады, бұл жерде 43 407 теңге - ең төменгі күнкөріс деңгейі.
Бұдан кейінгі жылдары ай сайынғы зейнетақы төлемінің мөлшері 5%-ға  ұлғайтылып отырады. БЖЗҚ-дан берілетін зейнетақы төлемдері жеке зейнетақы шотындағы зейнетақы жинақтары таусылғанға дейін төленеді.

Айна Ескенқызы