«Торпедо» тағы бір маңызды жеңіске жетіп, турнир кестесіндегі орнын нықтай түсті.

2023-24 жылдарғы 1хBet Pro hokei Ligasy тұрақты чемпионатының кезекті турында өз айдынында Павлодардың «Ертісін» қабылдаған жерлестеріміз ірі есеппен жеңіске жетті, деп хабарлайды Altainews.kz тілшісі.

Осы ретте, есеп айырмасының ірілігіне қарамастан бұл ойындағы алғашқы шайба бірінші кезеңнің аяқталуына санаулы секундтар қалғанда ғана соғылғанын айту керек. Матчтағы есепті бұл күні хет-трик авторы атанған шабуылшы Алексей Зубов ашты.

Ал екінші периодта айдын иелері шындап іске кірісіп, павлодарлықтардың қақпасынан тағы төрт мәрте саңылау тапты. Әбден есеңгіреп қалған қонақтар бұған бір-ақ дәл соққымен жауап қайыра алды.

Қаһарына мінген «торпедолықтар» болса, үшінші кезеңде де қарқынды бәсеңдеткен жоқ. Керісінше, қарсылас қақпасына үсті-үстіне шабуылдап, нәтижесінде торда тағы үш шайбаны тулатты. Қорытынды есеп - 8:1. Бұл биылғы маусымдағы өскемендік ұжымның ең ірі жеңісі екенін айтқан абзал.

Осылайша, қоржынына тағы екі ұпай салған «Торпедо» жарыс кестесіндегі төртінші орнын сақтап, соңынан келе жатқан қарсыластарынан ұзай түсті.

Дәл қазір өскемендік команда еншісінде 56 ұпай бар. Келесі ойынын «торпедолықтар» 31 қаңтар, сәрсенбі күні қонақта «Алматы» командасымен өткізеді.

Айта кетейік, осыған дейін «Торпедо» хоккейшілерінің 2023-24 жылдарғы 1хBet Pro hokei Ligasy плей-офф кезеңіне күні бұрын жолдама алып қойғаны туралы жазған болатынбыз.