Театр сахнасы арқылы өмірдің өзгеше қыры мен сыры көрерменге жол тартып келеді. ШҚО драма театры бұл жолы музыкалық драма арқылы көрерменге өзгеше әсер сыйламақ.

ШҚО драма театры осы сенбіде, яғни, 10 ақпан күні «Ұмытылмас күн» музыкалық драмасының тұсауын кесіп, көпшілікке ұсынады, деп хабарлайды Altainews.kz тілшісі.

Қойылым әртүрлі ортада өсіп-тәрбиеленіп бір мамандыққа оқуға түскен жастардың студенттік өмірінен сыр шертеді. Сан алуан жағдайларға тап болған басты кейіпкерлер достық, махаббат, адамгершілік сынды асыл қасиеттерге арқа сүйеп зиянды әрекеттер мен өшпенділікке қалай қарсы тұрды. Олар арманның соңына еріп мақсаттарына жете ме, әлде жамандықтың жетегінде кете ме? Қойылымның шешімін театр сахнасы арқылы көрген дұрыс болмақ.

Қойылым жанды жадыратар әсем ән, көңілді би, түрлі музыкалық аспаптармен сүйемелденеді.

Қойылымның режиссері бұған дейін «Өмір-өзен», «Алжир» сынды қойылымдармен көрермен жүрегін жаулаған жас режиссер Абай Дәулетұлы.