ШҚО-да шағын және орта бизнестің дамуына қолайлы жағдай жасалады
Алдағы уақытта өңірлік өндірістің өрісі кеңей түседі. Тек бейінді басқармалар мен жергілікті әкімдер кәсіпкерлікті дамытуға күш салуы тиіс. Ел экономикасының өсуі де бизнестің өркендеуімен тікелей байланысты. Үкіметінің кеңейтілген отырысының қорытындысы бойынша кеңес өткізген облыс әкімі Ермек Көшербаев осы мәселеге назар аударды, деп хабарлайды Altainews.kz тілшісі.
– Мемлекет басшысы экономикалық белсенділіктің өсуіне бағдарланбаған бюджетті бөлу жөніндегі жүйелі мәселелерге тоқталды: қаржы ағымдағы міндеттерге жұмсалады, ал стратегиялық мақсаттар екінші орынға ауысады. Экономика және бюджеттік жоспарлау басқармасына, қаржы басқармасына, қала-аудандардың әкімдеріне, сондай-ақ барлық бағдарлама әкімшілеріне бюджет шығыстарына талдау жүргізуді, жергілікті кәсіпкерлерге қолдау көрсету шараларын айқындауды тапсырамын, – деді өңір басшысы.
Облыс әкімі әрбір аудандағы көлеңкелі экономика мәселесін шешу жолдарын тауып, отандық өндірістерді дамыту үшін инвесторларды тартуды қарастыру маңызды екенін атап өтті. Сонымен қатар әр салаға қойылған стратегиялық мақсаттарға сәйкес экономикалық дамудың басымдықтарын анықтау қажет.
– Біз әрбір ауданда шағын және орта бизнесті дамуына жағдай жасап, инвесторларды тартуға күш салуымыз қажет. Өңірдегі дүкен сөрелері сапалы өнім шығаратын жергілікті өнім шығарушылардың тауарларымен толығуы тиіс. Бұл ел еліміздің экономикасын көтеруге де ықпал етеді, – деп түйіндеді облыс әкімі.
Оқи отырыңыз
