ШҚО-да туристер қар құрсауында қалып қойды
Құтқарушылар қар құрсауында қалып қойған туристерді құтқарды. Бұл туралы облыстық төтенше жағдайлар департаменті мәлімдеді.
Оқиға Катонқарағай ауданында орналасқан демалыс базаларының бірінде болған, деп хабарлайды Altainews.kz тілшісі.
Табиғат аясына демалуға шыққан бір топ турист жолды қар алып қалуына байланысты өз бетінше үйлеріне қайта алмай қалған. Содан төтенше жағдай қызметіне телефон шалып, көмек сұраған. Көп ұзамай оқиға орнына жол талғамайтын «Шерп» көліктерімен жеткен облыстық ТЖД мамандары туристерді Өскемен қаласына дейін аман-есен жеткізген. Департаменттен хабарлағандай, демалушыларға медициналық көмек қажет болмапты.
– ШҚО ТЖД тұрғындардан қауіпсіздік шараларын қатаң сақтауды сұрайды. Дауыл туралы ескерту жарияланған кезде елді мекендерден тыс жерлерге шықпаған абзал. Ал егер де қандай да бір қиын жағдайға тап болсаңыз, бірден 112 нөміріне қоңырау шалу керек, – деп ескертеді сала мамандары.
Оқи отырыңыз
