1992-ші жылы БҰҰ-ның Қоршаған ортаны қорғау және дамыту жөніндегі конференциясында 22 наурыз - Дүниежүзілік су ресурстары күні деп жарияланған болатын, деп хабарлайды Altainews.kz тілшісі.

Бұл күні біз тіршілік көзі болып табылатын судың баға жетпес байлық екенін тағы бір мәрте еске салып, су ресурстарын сақтау және оны тиімді пайдаланудың маңызды жөнінде ойлануымыз керек.

Осы мақсатта, Су ресурстары және ирригация министрлігі жаңа Су кодексінің жобасын әзірледі. Жаңа Су кодексінде су ресурстарын тиімді пайдалануға, су үнемдеу технологиялары мен суды қайта пайдалану жүйелерін қарқынды енгізуге басымдық беріледі. Ал су саласындағы бұзушылықтар үшін жауапкершілік заңнамалық деңгейде күшейтіледі.

Бүгінгі таңда Қазақстанда ауыл халқының 96,6%-ы, қала тұрғындарының 98,9%-ы орталықтандырылған ауыз сумен қамтамасыз етілген. Министрлік 2025 жылдың соңына қарай қазақстандықтарды 100% сапалы ауыз сумен қамтуды жоспарлап отыр.

Министрлік жұмысының тағы бір басым бағыты - елімізде су ресурстарын ұқыпты пайдалану мәдениетін қалыптастыру.