Синоптиктердің болжамынша, Қостанай облысында бүгіннен бастап ауа температурасы +20 градусқа дейін көтеріледі.

Оның үстіне аптаның ортасында жаңбыр жаууы мүмкін, деп хабарлайды Altainews.kz тілшісі KAZINFORM сайтына сілтеме жасап.

Қостанай облысының құтқарушылары өңірде су тасқыны жағдайы ушығып бара жатқанын ескертті. Қардың белсенді еруі мен жауын-шашынға байланысты 14 аудан қауіпті аймаққа енгізілді.

Мәселен, Қарасу, Әулиекөл, Наурызым, Қамысты, Сарыкөл, Алтынсарин, Меңдіқара және Ұзынкөл аудандарын су басуы мүмкін.

Бұған қоса, Ресей Федерациясының аумағынан ірі өзендер арқылы су ағыны артуы мүмкін.

Жітіқара, Денисов, Қостанай, Қарабалық, Федоров аудандары мен Бейімбет Майлин ауданы су ағынының қауіпті аймағында орналасқан.

Айта кетейік, Қостанай облысы су тасқынына байланысты қиын жағдайға тап болған еді. Кеше Арқалық маңындағы ауылдар су астында қалып, Қостанай іргесіндегі Амангелді ауылын да су басты. Жангелді, Амангелді аудандары мен Арқалық қаласы да қиын жағдайда. Онда 28 наурызда төтенше жағдай жарияланды.

Аймақ басшысы Құмар Ақсақалов су тасқынынан зардап шеккен тұрғындардың шығынын әкімдік өтейтінін айтты. Кейін Қостанай облысының әкімдігі келтірілген шығынның қалай есептелетінін және төлемнің қалай жүзеге асырылатынын түсіндірді.

Қазір су басқан аумақтардағы электр қуатын және коммуникацияларды қалпына келтіру жұмыстары жүргізіліп жатыр.