Өскеменде жоғары сынып оқушыларына кәсіптік бағыт-бағдар беруге арналған «My Pro» облыстық мамандықтар фестивалі басталды, деп хабарлайды Altainews.kz  тілшісі.

ШҚО кәсіптік білім беру орталығының басшысы Ләззат Кездікбаеваның айтуынша, облыстық білім басқармасының ұйымдастыруымен өңір оқушыларына мамандық таңдауға көмектесу, сұранысқа ие қандай мамандықтар бар екені және сол мамандықтар бойынша қай оқу орнында білім алуға болатындығы жайлы ақпарат беру мақсатында фестиваль жыл сайын өткізіледі. Шара аясында оқушылар бейімділігіне қарай мамандық таңдауға дұрыс бағыт-бағдар алады.

Биыл Өскемен қызмет көрсету саласы колледжінің базасында өтіп жатқан шараға облыс орталығындағы мектептердің 8-11 сыныптарында оқитын үш мыңға жуық оқушы мен NEET санатындағы жастар қатысуда.

Екі күн бойы өтетін фестивальда оқушылар Өскемен қаласындағы аймақтық колледждер мен жоғары оқу орындарының өкілдерінен облыстағы  сұранысқа ие мамандықтар туралы мағлұмат алып, шеберлік сабақтарына қатысып, кәсіби диагностикадан өтетін болады.

Орталық басшысының айтуынша, фестиваль екі түрлі форматта өтеді. Мәселен, аудандарда көшпелі іс-шаралар ұйымдастырылса, облыс орталығында «My Pro» облыстық мамандықтар фестивалі түрінде өтеді.

Фото: Валерий Шведов