Бүгін құжат бойынша Халық қаһарманы Қасым Қайсеновтің туған күні. Алайда даңқты батыр өз естелігінде 23 сәуір дүниеге келген күні емес екенін айтады.

Естелікті суретші, қаламгер Еркін Нұразхан жазып алған, деп хабарлайды Altainews.kz тілшісі. 

Естелікте: «Мынау, «туған күнің – 23-сәуір деп жүр ғой жұрт. Ол туған күнім емес. Бұл – өз өмірімнің ең мықты, қиын-қыстау кезеңіне жол ашқан, ес біліп, есейген кезімде үлкен өмір жолына қадам басқан күнім. 1938 жылы 23 сәуірде апаң екеуіміз Павлодар қаласына барып түстік. Өмірімнің жақсылығы да, болашаққа жол сілтеген сәтті күні де сол жерден басталды ғой деп ойлап жүрдім де, соғыстан оралған соң, жаңа паспорт алғанда туған күнім деп «23-сәуірді» жаздырғанмын. Әйтпесе, туған күнімді өзім қайдан білейін. Әкем де білмейді. Әкем арабша хат танитын әжептәуір сауатты адам болатын. Сөйте тұра, қалайда балаларының туған күндеріне мән бермеген.

Мен кей кезде әкемнен сұрайтынмын:

– Аға, осы мен қай жылы, қай айда тудым десем, ол айтатын: – Сен біздің үй өртенген жылы туғансың, – деп. Оның үйі қашан өртеніп жүргенін кім білсін», – деп жазылған.