Шығыс Қазақстан облысында осы жылдың төрт айында ғана білім саласындағы сыбайлас жемқорлыққа қатысты 11 қылмыстық іс тіркелген, деп хабарлайды Altainews.kz тілшісі.

Бұл туралы заңсыз ақша жинау фактілерінің алдын алу мақсатында балабақша, мектеп, колледж директорларының қатысуымен өткен жиын барысында ҚР Сыбайлас жемқорлыққа қарсы іс-қимыл Агенттігінің ШҚО бойынша департаменті басшысының бірінші орынбасары Талғат Башев мәлімдеді.

Департамент өкілінің айтуынша, 1424 колл-орталығына ата-аналар тарапынан «мектептің жөндеу жұмыстарына немесе сыйлыққа ақша жинап жатыр» деген наразылық арыз-шағымдары түсіп жатады. «Білім туралы» заңға сәйкес білім ошақтарында ақша жинауға тыйым салынған.

Мектепте ақша жинауға заңмен қатаң тыйым салынып, мектеп директорларына материалдық сыйақы мен пара алғаны үшін әкімшілік және қылмыстық жауапкершілік қарастырылған. Елімізде орта білім беру тегін. Білім ошақтарын жыл сайын ағымдағы жөндеуге мемлекеттен тиісті қаражат бөлінеді.

Сондықтан департамент өкілдері осындай фактілер болған жағдайда  ата-аналар 1424 колл-орталығына немесе департаменттің 29-88-88 номеріне хабарласу қажет екендігін айтты. Хабарласқан ата-аналар жайлы ақпарат құпия сақталады.