ҚР Мәдениет және спорт министрлігі туристер үшін инфрақұрылым қамтамасыз етіліп жатқан Қазақстанның ТОП-50 туристік орындарын атады, деп хабарлайды ҚазАқпарат.

«Мемлекет басшысының тапсырмасы бойынша туризмді дамыту мақсатында Үкімет тарапынан елімізде осы салаға арналған мемлекеттік бағдарлама әзірленіп жатыр. Бағдарлама мақсаты - ТОП-10 және ТОП-50 жобаларын құру арқылы өңірлер ұсыныстарымен инфрақұрылымды қамтамасыз ету», - делінген аталған министрліктің «ҚазАқпаратқа» берген жауабында.

Атап айтқанда, ТОП-10 жобаға Балқаш пен Алакөл жағалаулары, Шарын шатқалы, Алматы өңірінің тау кластері, көне Түркістанды қалпына келтіру, Ащысор туристік аймағы, Бурабай, Имантау-Шалқар және Баянауыл курорттық аймақтары, «Көшпелілер тарихы» орталығы еніп отыр.

Ведомство мәліметіне қарағанда, ТОП-50 туристік орындары мен жобалары Қазақстанның әр өңірін қамтыды.

Астанадағы нысандар: Елорданың сәулеттік-мәдени нысандары (Бәйтерек, Бейбітшілік және келісім сарайы мен басқа да нысандар), «Нұр әлем» музейі, "АЛЖИР" музей-мемориалдық кешені, Медициналық кластер, Білім беру кластері, Ғарыш музейі, Аквапарк, Халықаралық туризм университеті.

Ақмола облысында: Бурабай курорттық аймағы, Зеренді курорттық аймағы, Балалар-жасөспірімдер туризмі кластері.

Алматыда: «Медеу» спорт кешені, «Шымбұлақ» курорты, Үлкен Алматы көлі, Көктөбе саябағы, Алматының мәдени нысандары, «Көкжайлау» курорты. Алматы облысы: Қапшағай су қоймасы, Көлсай көлдері, «Алтынемел» ұлттық паркі, Іле-Алатау ұлттық саябағы, «Қорғас» халықаралық орталығы, «Happyland» паркі, Үлкен Алматы каналы.

 Ақтөбе облысында: Қарғалы су қоймасының курорттық аймағы.

Атырау облысында: Орта ғасырдағы Сарайшық кешені.

Шығыс Қазақстан облысында: Катонқарағай ұлттық паркі, Алтайдың тау шаңғысы кластері, Рахман қайнары.

Жамбыл облысында: «Ақыртас» сарай кешені, «Қарахан» кесенесі.

Батыс Қазақстан облысында: Бөкей ордасы тарихи-музей кешені, Балалар-жасөспірімдер туризмі кластері.

Қарағанды облысында: Қарқаралы курорттық аймағы, «Ұлытау» тарихи-мәдени кешені.

Қостанай облысында: Алтынсарин ауданының курорттық аймағы, Аңшылық туризмі кластері.

Қызылорда облысында: Қамыстыбас көлі курорттық аймағы, Жаңақорған курорттары, «Байқоңыр» ғарыш айлағы.

Маңғыстау облысында: Ақтау жағажай аймағы, «Кендірлі» курорттық аймағы, Тарихи-мәдени туризм бағытындағы нысандар.

Түркістан облысында: Сайрам-Өгем табиғи паркі, Сарыағаш курорттық аймағы, Тарихи-мәдени туризм бағытындағы нысандар, «Қасқасу» тау-шаңғы курорты.