Өскемен қаласының Құрметті азаматы, Ұлы Отан соғысының ардагері Иван Петрович Скворцов 88 жасқа қараған шақта дүниеден өтті. Бұл қайғылы хабар Иван Петрович соңғы кезде тұрып жатқан Новосібір қаласынан 9-қыркүйекте жетті.

Иван Петрович ұзақ та мәнді, жарқын оқиғаларға толы өмір сүрді. Ол 1925 жылғы 26 қыркүйекте Катонқарағай ауда-нының Хайрузовка ауылында дүниеге келді. 1943 жылы әскер қатарына шақырылды. Молдавияны, Болгарияны, Румынияны және Югославияны фашист басқыншыларынан азат етуге қатысты. «Қызыл Жұлдыз», 2-дәрежелі «Ұлы Отан соғысы» ордендерімен, «Ерлігі үшін», «Будапешті алғаны үшін» медальдерімен марапатталды.

«Алтайсвинецстрой» тресінде кәсіподақ комитетінің төрағасы болып жұмыс істеді.

Құрметті еңбек демалысына шыққанға дейін құрылысшылар кәсіподағы Шығыс Қазақстан облыстық комитетін басқарды.
Қажыр-қайраты, тың идеялары мол ардагер үшін өмірдің жаңа кезеңі тағлымды істерге толы болды. «Құрмет» ордені, «Қазақстан Республикасының Конституциясына-10 жыл» медалі 2012 жылы Өскеменнің Құрметті азаматы атан-
ған белсенді жанның, қала патриотының марапаттамаларының заңды жалғасы іспетті еді.

Иван Петрович Скворцов өскемендіктердің, жалпы шығысқазақстандықтардың жадында сөз бен істің, ар-ожданның, әділдіктің, жоғары зиялылықтың және мәдениеттің, белсенді азаматтық ұстаным мен нағыз қазақстандық патриотизмнің адамы ретінде сақталады.

Бердібек Сапарбаев,
Григорий Пинчук,
Ермек Көшербаев,
Нұрымбет Сақтағанов,
Ерлан Текешов,
Жақсылық Омар,
Владимир Кошелев.