Астана мен Алматыдан Украина астанасы Киевке тікелей тұрақты әуе қатынасы ашылды , деп хабарлайды Аltaynews.kz тілшісі «Эйр Астана» әуекомпаниясының баспасөз қызметіне сілтеме жасап.
«Өзінің маршруттық желісін дамытуды көздеген «Эйр Астана» әуекомпаниясы 2013 жылдың 31 наурызынан жаңа екі рейс ашты. Дүйсенбі, сәрсенбі және сенбі күндері Embraer 190 әуелайнері Астана-Киев бағытында ұшады, ұшу ұзақтығы 4 сағатты құрайды. Сейсенбі, жұма және жексенбі күндері Airbus A320 жайлы әуелайнері Алматы-Киев бағытына қатынайды, ұшу ұзақтығы 5 сағатты құрайды» делінген баспасөз парағында.
Жаңа рейстермен «Эйр Астана» әуекомпаниясының маршруттық желісі 40 рейске дейін көбейді.
Жаңа бағыттар қазақстандық саяхатшылар үшін Киев арқылы Еуропаға қатынауды жеңілдетсе, ал украиналықтар Қазақстанның жас елордасы Астананы, республиканың іскерлік және мәдени орталығы Алматыны тамашалай алады.
Астанадан Киевке эконом-кластағы барып-қайту билетінің құны, барлық алымдарды қосқанда, 47 717 теңгеден, ал бизнес-класта – 210 717 тенгеден басталады. Сондай-ақ, Алматы-Киев-Алматы бағыты бойынша эконом-кластағы сапар 49 356 теңге, бизнес-класта – 211 358 теңге тұрады.
