Қазақстандық боксшы Серік Сәпиев Олимпиаданың техникалық ең шебер былғары қолғап шеберіне берілетін Вэл Баркер Кубогына ие болды, деп хабарлайды Аltaynews.kz тілшісі.
Серік Сәпиевтің осындай құрметке ие боларына сенім мол еді. Біздің боксшы Олимпиададағы барлық жекпе-жектерде жоғары техникалық шеберлігін көрсетті. С,Сәпиевтің рингтегі өнері спорттың осы түрін сүйетін жанкүйерлердің бәрінің де көңілінен шығып, сүйсіндіргені сөзсіз.
Осы арада қазақстандық мектепті мақтанышпен атап өткен орынды. Ол Серік Қонақбаев, Виктор Демьяненко, Эрик Хакимов, Ермахан Ыбырайымов, және басқа да техникалық шебер боксшыларымызды өсіріп шығарды.
Серік Сәпиев Вэл Баркер Кубогына ие болған үшінші қазақстандық болды. 1996 жылы Атлантадағы Олимпиада қорытындысында бұл құрметті жүлде олимпиада чемпионы Василий Жировқа берілген болатын.
2004 жылы Кубок Афины-2004 олимпиадасының чемпионы тараздық мектептің өкілі Бақтияр Артаевқа берілді.
Бұл наградаға ие болғандардың арасында Рой Джонс, Теофило Стивенсон, Олег Саитов сияқты ұлы боксшылар бар.
Лондонда бұл наградаға Серік Сәпиев лайықты деп танылды.
