Сәлеметсіздер ме құрметті радиотыңдаушылар! «Алтайньюс» сайтындағы «Алтай» интернет-радиосының жаңалықтарын тыңдаңыздар.

Өскемендегі сәулетті жаңа мешіт 21-тамызда ашылады. Тамыз айы басталғалғаннан бері бұл құрылыстың екінші тынысы ашылды. Мешіт құрылысында күн құрғатпай жұмыс істеген адамдардың саны 400-ден төмен болған жоқ Оның үстіне көмекке келген аудандардың тұрғындары да екі күн қатарынан еселі еңбек етіп жатыр.

Көкпекті ауданы Самар ауылындағы «Талды Екпін» шаруа қожалығы инвестициялық жоба бойынша 400 бас ірі қара малды бордақылайтын алаң ашуды қарастыруда. «ҚазАгроҚаржы» акционерлік қоғамынан 470 миллион теңге сомасына қарыз қаражатын алу үшін бизнес жоспарын жасады. Бүгінгі күнге қуаттылығы тәулігіне 20 тонна болатын мал азығы цехын іске қосты. Ресейдің Алтай өңірінен 300 бас асыл тұқымды қазақтың ақбас сиырын сатып алу үшін келісімшарт жасады.

Павлодар қаласында жергілікті және Семейдегі педагогикалық жоғарғы оқу орындарының студенттері арасында қазақтың аса көрнекті қайраткері Абай Құнанбаевтың шығармаларын мәнерлеп оқудан аймақтық байқау өтті. Семейлік студенттер Рүстем Мұхаметрахымов байқаудың бас жүлдесін жеңіп алса, Арман Шеризатов бірінші орынды иеленді.

Семейдегі тері-мех комбинатының алаңында Шығыс Қазақстан облысының 80 жылдығына арналған көркемөнерпаздар концерті ұйымдастырылды. Қаланың Затон аумағы тұрғындарының алдында Прииртышье ауылдық округінің өнерпаздары өз өнерлерін ортаға салды. Тұрғындар халықтық және ел арасына көп тараған танымал әндерді естіп, би билеп, көңіл-күйлерін көтерді.

Семейде 4 жасар бала ашық жатқан кәріз құдығына құлап, аман қалды. Тереңдігі екі метрлік шұңқыр қалдық суға толы екен. Тұншығып қала жаздаған бүлдіршінді құдай сақтап көршісі құтқарып алған. Қапыда ұлынан айырыла жаздаған ата-ана енді жергілікті биліктен шара қолдануды талап етіп отыр.