Өскемендегі Достық үйінде мерекелік концерт өтті
1 наурыз – Алғыс айту күні қарсаңында облысымызда көптеген мәдени-рухани іс-шаралар өтті. Олардың легі бүгін кешкісін Өскемендегі Достық үйі – Қоғамдық келісім орталығында ұйымдастырылған мерекелік концертпен жалғасты.
Мерекелік концерт барысында көпшілік қауым Достық үйі – Қоғамдық келісім орталығының шығармашылық ұжымы дайындаған концерттік бағдарламаны тамашалап, ерекеше әсер алды, деп хабарлайды Altainews.kz тілшісі.
Концертке жиналған жұрт еліміздегі түрлі ұлт өкілдерінің өнерлерін тамашалап, мерекенің мәні мен маңызын сезініп қайтты.
– Алғыс айту күніне орай өткен іс-шараларды қорытындылап, мерекелік концерт өткізіп отырмыз. Концертте өзге ұлт өкілдері өнер көрсетіп, қазақ еліне алғысын, ризашылығын білдірді. Қазақтың биін билеп, әнін салды, – дейді Достық үйі – Қоғамдық келісім орталығының директоры Эльдар Төлеубеков.
Сонымен қатар,концертке келген қонақтар әртүрлі тақырыпты арқау еткен сурет көрмесін тамашалады.
– Алғыс айту күнінің тарихы терең, тағылымы мол. Оны біз жыл сайын мерекелік көңіл күймен қарсы алып келеміз. Кезінде кең пейіл қазақ халқы жер аударылып келген жұрттарды бауырына басып, барын бөліп берді. Еліміздегі этнос өкілдері тату-тәтті ғұмыр кешіп келеді. Сондықтан Алғыс айту күні қарсаңында кез келген өзге ұлт өкілдерінің алғыс айтып, ризалықтарын білдіруі заңдылық деп ойлаймын. Тіпті, бір-бірімізге алғыс айтудың артықшылығы жоқ, – дейді қала тұрғыны Нұрхан Тілеуханов.
Концерт барысында шешен этносының «Вайнах» ансамблі қазақ биін билеп, жиналған жұртты тәнті етті.
Оқи отырыңыз
