Өскеменде белгілі жазушы Сәуле Досжанның “Өмір бәйтерегі” атты кітабының тұсаукесер рәсімі өтті, деп хабарлайды Altainews.kz тілшісі.

Шығыс Қазақстан облыстық балалар және жасөспірімдер кітапханасында Қазақстан Жазушылар одағының мүшесі, ақын, журналист Сәуле Досжанның “Өмір бәйтерегі” атты кітабының таныстырылымы өтті. Салтаннатты шараға қаламгердің шығармаларын сүйіп оқитын көпшілік жиналды.

Туынды Өскемен қаласының кітапханалар сөресіне қойылмақ.

Кітапта қазақ халқының жеті аталық жүйесі, оның әлеуметтік, рухани, биологиялық мәні, сондай-ақ туыстық қатынасты сақтаудың маңызы кеңінен баяндалады. Автор тарихи деректер мен заманауи көзқарасты ұштастыра отырып, жастарды тектілікті тануға, рухани жаңғыруға үндейді.

Қазақ поэзия айдынында ғана емес, прозасында да ерекше талантымен көзге түскен Сәуле Досжанның бүгінгі күнге дейін “Жыр тәж”, “Арман қала”, “Құдіретті қалам иесі”, “Қасірет пен тағдыр” сынды көптеген шығармалары жарық көрген.

Ал енді ғана басылып шыққан кітабында қаламгердің жеті ата тақырыбына қатысты толғамды ойлары қамтылған.

Жайна Сыранова

Фото: Жәнібек Ырысбай