Биыл Тарбағатай ауданының құрметті азаматы, ҚР Журналистер одағының мүшесі, ақын Бақыт Ихсановтың туғанына тоқсан жыл толып отыр. Барқытбел жұрты жерлес ақынының торқалы тойы қарсаңында мүшәйра ұйымдастырып, қаламгердің жаңа кітабының тұсаукесер рәсімін өткізді, деп хабарлайды Altainews.kz  тілшісі.

Қаламгер Бақыт Ихсанов оқырман қауымға «Сырымды айтам», «Жырла жүрек сырласым», «Тамырым менің тереңде», «Ұйқым келмейді», «Қанатты жылдар», «Таңдамалы» сынды еңбектерді рухани азық етіп қалдырды. Ақжар мәдениет үйінде ақынның 90 жылдығына арналған «Ғасыр дауысы келеді құлағыма» атты еске алу кеші өтті. Кеш қалемгер шығармашылығына арналған театралды поэтикалық қойылыммен басталып, ақынның «Сезім сырлары» атты кітабының тұсаукесерісмен жалғасты.

Сонымен қатар «Ғасыр дауысы келеді құлағыма» атты облыстық ақындар мүшайрасының жүлдегерлері анықталды. Топ жарған ақындарға сыйақы табысталды. Жыр сайысына 40-қа жуық ақын қатысып, 10 ақын жүлдегер атанды.

Рухани кеш барысында Тарбағатай ауданы әкімінің орынбасары Болатбек Мамырбаев құттықтау сөз сөйлеп, Қазақстан Бас редакторлар клубының президенті Бибигүл Жексенбайдың және Қазақстан Жазушылар Одағының арнайы хатын ақынның балаларына табыс етті. Рухани шараға жиналған жұрт ақын жайлы естеліктер легіне құлақ түріп, ән мен жыр тыңдап қайтты.

Өлең өмір дүниесіне жоғалмас қазынадай жырларын қалдырған Бақыт ағамыздың қызы Гүлжанат Бақытқызы ақынның жаңа кітабын кеш қонақтарына сыйға тартып, аудан кітапханаларына табыс етті.