Өскемен қаласында 600 оқушыға арналған жаңа мектептің құрылысы жүріп жатыр. Бұл мектеп іске қосылған соң әсіресе тез дамып келе жатқан КШТ шағын ауданындағы мектептердің жүктемесі жеңілдей түседі, деп хабарлайды Altainews.kz тілшісі.

Есенберлин даңғылы бойынан бой көтеріп жатқан бұл білім ордасы «Келешек мектептері» ұлттық жобасы аясында салынып жатыр. Құрылысты «AST Qurylys 22» компаниясы жүргізуде.

Жаңа мектептің құрылысын «AMANAT» партиясының депутаттары өз бақылауына алған. Олар бұл нысан партияның сайлауалды бағдарламасындағы маңызды әлеуметтік міндеттердің бірі екенін айтты.

Қазір мектептің негізгі құрылыс жұмыстары аяқталған. Ішкі әрлеу, инженерлік жүйелерді орнату секілді жұмыстар жүріп жатыр.

Құрылыс барысы тамыз айының соңында депутаттар тарапынан тағы бір рет тексеріледі.

Айта кетейік, бұл – «Келешек мектептері» бағдарламасымен ШҚО-да салынып жатқан жалғыз нысан емес.

Елизавета Седых

Фото: Жібек Нұрахмет