Бүгін Өскеменде ерекше форматтағы мерекелік шара өтті. Ұлттық Домбыра күні мен Су шаруашылығы қызметкерлері күніне орай Ертіс өзенінде су көліктері шеруі ұйымдастырылды. «Самал» саябағынан шыққан, Қазақстан Туымен безендірілген тоғыз көлік Ертіс жағалауымен Пристань айлағына дейін сапарлады. Қырық жылдан кейін жаңғырып отырған мереке халық пен билік арасындағы жылы жүздесуге ұласты, деп хабарлайды Altainews.kz тілшісі. 

Таңертеңнен Өскемен өзен вокзалы маңында ұлттық әуендер шырқалып, қала халқы мерекені көруге асықты. Облыс әкімі Нұрымбет Сақтағанов шеруді жағалауда өскемендіктер мен қала конақтарымен бірге тамашалап, емін-еркін ашық әңгіме құрды.

Бұл шара рухани құндылық пен табиғаттың үйлесімін көрсететін ерекше форматтағы мерекенің үлгісі болды. Ертіс өзені бойындағы ұлттық сарын мен жылы жүздесу, домбыра үні мен халықтың көңіл күйі – барлығы да ел бірлігін, мәдениетке деген құрметті көрсетті.

Бұл мерекенің маңызын тереңнен түсінуіміз керек. Өзен көлігі – жүк тасымалында тиімді, арзан және экологиялық жағынан таза көлік түрі. Облыс әкімі болашақта осы бағытта жұмыс жүргізіп, өзен көлігін дамыта түсу қажеттігін баса айтты.

Осылайша алғаш рет соңғы қырық жыл ішінде азаматтық жолаушылар флотының жаңғыруы байқалды. Мұны қайта өрлеудің бастауы деуге болады. Шеруге қатысқан көлік құралдары қатарында «Су жолдары» мекемесіне тиесілі «Болат Карентаев», «Алтай», «КС-111» атты үш бірдей теплоход және “BELALEKS” компаниясының бес катері, жеке меншіктегі гидроциклдер, моторлы қайықтар болды. Жағалауда оларды мерекелік шарлармен қарсы алған тұрғындар қуаныштарын жасыра алмай, ерекше сезімде тұрды. 

Өскемендіктер мен қала қонақтары үшін тамаша көңіл-  күй көтеретін демалыс түрінің бірі – өзен трамвайларымен саяхат.  Олег Ивановичтің айтуынша, Ертіс өзенімен өзен трамвайлары қатынасын жаңғырту идеясы  2015 жылы туғанымен, нақты әрекетке 2020 жылы, яғни COVID-19 пандемиясы басталған тұста кірісіпті. Дәл сол кезеңнен бастап жолаушылар ағыны қарқынды өсе бастады. Мысалы, 2020 жылы  20 мың жолаушыны тасымалдаса, бүгінгі күні бұл көрсеткіш 100 мыңнан асып отыр.

Жаңа бағыттар ашылуда. Соның ішінде аса сұранысқа ие маршрут – Өзен вокзалы мен «Самал» саябағы бағыты. Қала әкімдігі бұл бағытты қолдап, өз үлесін қосты. Алдағы уақытта Өзен вокзалы – Самал паркі – қалалық жағажай» бағыты іске қосылады деп күтілуде. Бұл бағыт бойынша қозғалыс келесі жылы басталып, тұрғындарға жағажайға бару үшін қолайлы жағдай туғызылмақ.

Кемелердің бірінде Ұлттық домбыра күніне орай «Жұлдыз» өнер мектебінің жиырма домбырашысы Құрманғазының, Динаның, халық күйлерін сұңқылдатты. Жас домбырашылар алты күй орындап, мерекенің ажарын аша түсті.

Домбырашылардың ең жасы - сегіз жастағы Шынар. Ұлттық аспабымызды шертуді алты жасынан үйреніп жүр.

Айтпақшы, Шынардың ағасы Аян да домбыраның құлағында ойнайды екен. 

Аружан Жұмабекова Өскеменге басқа қаладан қонақтап келіпті.

Ертіс жағалауында «Дарабоз» ансамблі мен қаланың басқа да шығармашылық топтары өнер көрсетіп, мерекенің сәнін кіргізді.

Фото: Екатерина Семина, Махаббат Ахметжанова

Видео: Жалғас Сакадиев