Өскемендегі Қазақстан көшесінде – Пермитиннен Горькийге дейінгі аралықта жаяу жүргіншілер аллеясының жаңғыртылуы жалғасуда. Бұл жобаның ерекшелігі – оған ШҚО мен Алматы облысындағы түзеу мекемелерінің сотталған азаматтарының қатысуы, деп хабарлайды Altainews.kz тілшісі.

Ресоциализация бағдарламасының бастамашысы Данил Аитовтың айтуынша, бұл – Президент әкімшілігіне ұсынылған алғашқы осындай форматтағы жоба.

Сотталғандар тротуар тасын төсеу, орындықтар мен шағын сәулеттік формаларды орнату жұмыстарымен айналысуда. Аллея бойына шамамен 230 заманауи шам қойылады деп жоспарланған. Бұл тек жайлылықты арттырып қана қоймай, түнгі уақытта қауіпсіздікті қамтамасыз етеді.

Сонымен қатар балалар алаңдары мен спорттық жаттығу құрылғылары орнатылып, аллеяны отбасылық әрі белсенді демалыс орнына айналдыру көзделуде.

Жобада жергілікті мердігер ұйымдар да тартылған. Бұл – мемлекеттік құрылымдар, бизнес және әлеуметтік осал топтар арасындағы өзара әрекеттесудің жаңа форматы. Аллеяны жаңарту жұмыстары жаз соңына дейін, яғни Қала күні қарсаңында аяқталады деп жоспарланған.

Жаңартылған бұл аумақ келешекте қала тұрғындары үшін жайлы, әсем әрі әрбір элементінде өмірден алынған шынайы оқиға жатқан тартылыс орталығына айналуы мүмкін. Егер пилоттық жоба сәтті жүзеге асса, мұндай тәсілді өңір ішінде ғана емес, еліміздің өзге өңірлеріне де үлгі етіп енгізуге болады.

Дамир Омаров

Фото: Өскемен қаласы әкімдігі