2025 жылдың алғашқы бес айының қорытындысы бойынша елде ана мен нәресте өлімінің көрсеткіштері айтарлықтай төмендеді, деп хабарлайды Altainews.kz тілшісі ҚР Денсаулық сақтау министрлігіне сілтеме жасап.

Ұлттық статистика бюросының мәліметінше, нәресте өлімі 26%-ға, ал ана өлімі 10%-ға жуық төмендеген. Бұл – елімізде балаларға медициналық көмектің сапасын арттыру, перинаталдық қызметті дамыту және жаңа туған нәрестелерге уақтылы көмек көрсету шараларының нәтижесі.

Жаңа туған нәрестелер хирургиясының дамуының арқасында жыл сайын туа біткен ақаулары бар шамамен 1500 бала дер кезінде операциялық көмек алады. Елде тиімді инфрақұрылым құрылды – бір күндік клиникалар, ұрықты қорғау орталықтары, ерте араласу орталықтары. Сонымен қатар 40 туа біткен ақауларды емдеу орталығы, 20 көру және есту қабілетін қорғау орталығы жұмыс істейді.

Министрліктің мәліметінше, бұл шаралар нақты нәтижелер беріп отыр: жаңа туған нәрестелердің өмір сүру деңгейі 88%-дан 93%-ға дейін өсті, ал туа біткен ақаулары бар балалардағы бастапқы мүгедектік 7,5%-ға төмендеген.

Бүгінгі таңда республикада 75 оңалту орталығы жұмыс істейді, оның 25-і «Қамқорлық» бастамасы аясында ашылған. Мамандар тапшылығын шешу мақсатында «Педиатрия» мамандығы қайта қалпына келтірілді, сондай-ақ балаларға арналған 14 бағыт бойынша резидентура ашылды.

2024 жылдың маусым айынан бастап босандыру қызметінің қаржыландыруы арттырылды: аналар мен балаларға медициналық көмек көрсетуге қатысты бес негізгі профиль бойынша тарифтер 40%-ға өсті. Бұл шаралар медициналық көмектің сапасын арттырып қана қоймай, оның қолжетімділігін де кеңейтті.

Роксана Глыбова