Шығыс Қазақстан облысында пайдаланылмаған ауыл шаруашылығы жерлерін қайтару және айналымға енгізу жұмыстары белсенді түрде жүргізілуде, деп хабарлайды Altainews.kz.

Облыс әкімдігінде өткен отырыста Жер қатынастары басқармасының басшысы Надежда Михейлис 2025 жылғы 24 шілдеде облыс қалалары мен аудандарының әкімдеріне пайдаланылмаған егістік пен жайылымдар бойынша мәліметтерді Жер ресурстарын басқару департаментіне жіберу, жоспардан тыс тексерістер жүргізу тапсырылғанын еске салды.

Қазіргі уақытта тексеруге 56,6 мың гектар жер ұсынылған. Оның 53,8 мың гектары – жайылым, 2,8 мың гектары – егістік жерлер (Алтай, Зайсан, Катонқарағай, Күршім, Тарбағатай, Ұлан, Үлкен Нарын және Шемонаиха аудандары). Глубокое ауданы, Риддер және Өскемен қалалары деректерді «Ауыл шаруашылығы жануарларын идентификациялау» ақпараттық жүйесі арқылы жаңартып отыр, ал Марқакөл мен Самар аудандары бұл жұмысты жүргізбеген.

Жоспарларды әзірлеу – жайылымдарды тиімді пайдалану, қоректік база сақтау және заң талаптарын орындау үшін міндетті.

Тарбағатай, Самар аудандары мен Риддер қаласының әкімдеріне жоспарларды жасауға қаражат бөлу тапсырылды. Қазір тек Риддерде жоба қаржыландырылған, ал Тарбағатай мен Самарда тапсырма орындалмаған.

Президент Қасым-Жомарт Тоқаев 2025 жылғы 8 қыркүйектегі Жолдауында 2026 жылдың ортасына дейін қайтарылған ауыл шаруашылығы жерлерін толық айналымға қосу қажеттігін атап өткен болатын. 

Жер қатынастары басқармасының дерегі бойынша, 423,6 мың гектар қайтарылған жердің 70,6 мың гектары (17%) ауыл шаруашылығында пайдалануға берілген, оның 40,4 мың гектары – тұрғындардың қажеттілігі үшін, 30,2 мың гектары – агроформалауларға конкурс негізінде берілген.

Егер барлық тапсырмалар орындалса, 2026 жылдың ортасына дейін Шығыс Қазақстан облысы қайтарылған ауыл шаруашылығы жерлерін толық айналымға қосып, өңірдегі жайылым тапшылығын шешеді.

Дамир Омаров
Фото: Махаббат Ахметжанова