«Altainews» медиа-орталығының редакциясына белгілі болғандай, Шығыс Қазақстан облысының соттары спорт басқармасының бірқатар ісіне адал емес қызмет жеткізушілерге қатысты миллиардтаған теңге өндіру туралы талап-арыздарын қанағаттандырды.

Сот материалдарына сәйкес, «Electronic Sport» жауапкершілігі шектеулі серіктестігі балалар мен жасөспірімдер спорт мектептерімен және олимпиадалық резерв мекемелерімен нақты өткізілмеген іс-шаралар мен қызметтерге көпмиллиондық келісімшарттар жасаған.
Ал «Алтай-Атлет» спорттық-кәсіби клубы ойын спорт түрлері бойынша қызмет көрсетуге міндеттелгенімен, жұмыстар тек қағаз жүзінде орындалған.

Сот спорт басқармасы мен оған қарасты спорт ұйымдарының аталған компанияларға қарсы талап-арыздарын қолдап, оларды миллиардтаған қаражатты толық көлемде қайтаруға міндеттеді.

Қазіргі уақытта спорт басқармасының жалпы бюджеті 15 миллиард теңгені құрайды. Оның ішінде 5 миллиарды жоғары жетістіктер спортымен айналысатын клубтарды қолдауға және дамытуға бағытталған.

Асқар Можановтың айтуынша, бюджет қаражатының ашықтығын арттыру, тәртіп орнату және жауапкершілікті күшейту бағытындағы жұмыс жүйелі түрде жалғасын табады.