Шығыс Қазақстан облыстық балалар және жасөспірімдер кітапханасында «Таза Қазақстан» республикалық экологиялық акциясы аясында «Книгологично-2025» атты ерекше фестиваль өтті. Бұл іс-шара оқуға деген сүйіспеншілік пен табиғатты аялау идеясын біріктіріп, шығармашылық пен экологиялық ағартуға арналған үлкен алаңға айналды, деп хабарлайды Altainews.kz тілшісі.

Фестиваль барысында қатысушылар экологиялық мәдениетті қалыптастыруға бағытталған түрлі шараларға атсалысты. Бағдарлама аясында пластикалық қақпақтарды жинау бойынша экологиялық акция ұйымдастырылып, қайта өңделген материалдардан ерекше панно, логотип және символдар жасауға арналған шеберлік сабақтары өтті. Сондай-ақ көркем инсталляциялар қойылған көрме мен табиғатты пластикамен ластау мәселелері мен оның қайта өңдеудің маңыздылығы туралы ақпараттық таныстырылымдар көпшіліктің назарын аударды.

Шараға арнайы шақырылған Өскемен қаласындағы қайта өңдеу зауытының өкілі шақырып, балалар бойында экологиялық мәдениетті қалыптастыру маңыздылығын баса жеткізді. 

Фестивальге Күршім өңірінің тумасы, экологиялық өнерді насихаттаушы Оралбек Булжанов онлайн қатысып, қолдан жасалған туындыларын таныстырды. Шебер он жылдан астам уақыт бойы пластикалық бөтелкелерден түрлі декоративтік мүсіндер жасап келеді. Оның еңбектері көрермендерге тұрмыстық қалдықтарға жаңа көзқараспен қарауға және шығармашылық тұрғыдан пайдалануға мүмкіндік берді.

Шараның ең әсерлі бөлігі – жиналған пластикалық қақпақтардан жасалған үлкен композиция болды. Ол қатысушылардың таза және жасыл болашаққа деген ортақ ниетінің символына айналды.

«Книгологично-2025» фестивалі экология, шығармашылық және оқырмандық мәдениетті тоғыстырып, қоршаған ортаны қорғауға бағытталған мәдени-ағартушылық іс-шара ретінде есте қалды.