Осы аптада өтіп жатқан дәстүрлі «Туған жер – алтын бесігім!» жобасы облыс орталығының тұрғындары мен қонақтарын Марқакөл ауданының қайталанбас табиғаты, бай тарихы және еңбекқор адамдары қалыптастырған өзіндік болмысымен таныстыруда. Облыстық филармония фойесінде ұйымдастырылған тақырыптық көрме ауданның табиғи ерекшеліктерін ғана емес, рухани қазынасы мен тұрғындарының жетістіктерін де паш етті. Ал концерттік бағдарлама марқакөлдіктердің шығармашылық әлеуетін кеңінен паш етті, деп хабарлайды Altainews.kz тілшісі.

Көрменің табиғи байлығын танытатын бөліміне Марқакөл мемлекеттік табиғи қорығының мұражай экспозициялары ерекше реңк берді. Қызыл кітапқа енген құстардың үлгілері, жас суретшілердің жұмыстары, оның ішінде Қар барсы күніне орай дайындалған ілбіс бейнелері көпшіліктің назарын аударды.

Тарихи бөлім Боран ауылындағы мектеп-гимназиясының Құмаш Нұрғалиев атындағы кабинет мұражайының жәдігерлерін қамтыды. Онда Ұлы Отан соғысындағы жауынгерлік хаттар, халық мұғалімінің қолжазбалары, тұрмыстық заттары – үлкен үстел сағаты, самаурын және оның ерекше жақсы көретін грузин шайы қойылған.

Көрменің жастар болашағына арналған «Марқакөл болашағы» атты бөлімі де келушілердің қызығушылығын тудырды. №1 орта мектептің оқушылары жасанды интеллект көмегімен әзірлеген экспонаттары мен өздері құрастырған қозғалмалы роботтарын таныстырды.

Мыс кенін өндіру және байыту саласында жұмыс істейтін «ГРК МЛД» ЖШС байыту фабрикасының макетін, мыс концентратын алу процесін, сондай-ақ сирек минералдар мен табиғи мыс топтамаларын ұсынды.

Көрмеден кейін қонақтар концерт залына шақырылды. Сахнада ауданның вокалдық және хореографиялық ұжымдары өнер көрсетті. Әсіресе, майдан жылдары мен Құмаш Нұрғалиевтің өміріне арналған театрландырылған қойылымдар көптің көңілін толқытты. Майданнан хат жазу сәттері, соғыстан аман-есен оралуы, ауыл балалары үшін мектеп салуға деген табандылығы сахнада әсерлі көрініс тапты. Концерт аяқталған соң көрермендер ұзақ қол соғып, өнерпаздарға зор қошеметін көрсетті.

Еске сала кетейік, ертең таңғы 08:00-де «Алтай» көтерме-тарату орталығында Марқакөл ауданының ауыл шаруашылығы тауар өндірушілерінің жәрмеңкесі өтеді. Онда Өскемен тұрғындары мен қонақтары қолжетімді бағамен экологиялық таза өнімдерді – сиыр, жылқы, қой, шошқа еті, сүт және бал өнімдері, көкөніс, жеміс-жидек және басқа да табиғи тауарларды сатып ала алады.

Роксана Глыбова

Фото: Жібек Нұрахмет

Видео: Руслан Акматалиев