2025 жылғы 3 желтоқсан күні Шығыс Қазақстан облыстық филармониясында Халықаралық мүгедектер күніне орай облыстық «Рухты теңдік» инклюзивті фестивалі өтеді. Іс-шара облыстық әкімдік қолдауымен ұйымдастырылып отыр. Бұл туралы бүгін «Шығыс Қазақстан облыстық зағип және нашар көретін азаматтарға арналған арнайы кітапхана директоры Бекайым Ұябаева ШҚО өңірлік коммуникациялар қызметі алаңында өткен брифинг барысында баяндады, деп хабарлайды Altainews.kz тілшісі.

Фестивальдің мақсаты — ерекше қажеттіліктері бар адамдардың шығармашылық әлеуетін дамыту, инклюзивті бастамаларды қолдау және қоғамда толерантты көзқарасты қалыптастыру. Қатысушылар құрамында Өскемен қаласы мен облыстың Глубокое, Ұлан, Шемонаиха, Катонқарағай, Тарбағатай, Күршім, Үлкен Нарын аудандарының шығармашылық ұжымдары мен орындаушылары бар.

Бекайым Ұябаева фестивальге қатысуға барлығы 66 өтінім түскенін айтты. Оның 39-ы – облыс орталығының тұрғындарынан, 27-і – аудандардан. Ең көп қатысушылар Тарбағатай ауданынан – 10 адам және Шемонаиха ауданынан – 9 адам тіркелген. Өзге өңірлер де өз талантты орындаушыларын және шеберлерін жіберіп, белсенділік танытыпты.

Фестиваль бірнеше номинацияны қамтиды:

• вокалдық және аспаптық орындау;

• авторлық шығармашылық (поэзия, ән, музыка);

• бейнелеу өнері;

• қолданбалы қолөнер.

20 қарашада арнайы кітапхана базасында тәуелсіз қазылар алқасының отырысы өтті. Мәдениет және білім беру мекемелерінің сарапшылары қатысушылардың жұмыстарын мұқият бағалап, сапасына, өзіндік ерекшелігіне және орындаушылық шеберлігіне ерекше назар аударды.

Ұйымдастырушылардың айтуынша, «Рухты теңдік» фестивалі — қатысушыларға өз таланттарын ашуға, ал қоғамға — инклюзивті әрі қолдаушы болуға мүмкіндік беретін маңызды жоба болып қалыптасып келеді.

Айна Бакимбаева 

Фото: Артем Жигулин