Шығыстың шыңын қар басқан шақта, елдік мұратты мақсат еткен бір топ өр рухты жас Отан алдындағы антын орындауға бет алды. Шығыс Қазақстаннан әскерге шақырылған 23 сарбаз ҚР Ұлттық ұланның 5571 әскери бөлімінде бір жылдық қызметін өтемек. Алматы қаласындағы әскери бөлімге жас толымды шығарып салу рәсімі әскери оркестрдің салтанатты әуенімен басталып, елдік рухты асқақтата түсті, деп хабарлайды Altainews.kz.

Күзгі шақырылымда сапқа қосылғандардың бірі – Азамат Мұратов. Жиырмаға енді толған жігіттің жүрегі ел қорғау жолына баяғыдан дайын екені байқалады. Ол үшін армияға бару – міндет қана емес, ер азаматқа лайық ең үлкен жауапкершіліктің бірі.

Жас сарбаздар алда күтіп тұрған бір жыл ішінде әскери өмір мектебінен өтіп, темірдей тәртіпке бой үйретіп, жауынгерлік дайындықтың қыр-сырын меңгереді. Олар Бауыржан Момышұлы атындағы бригада құрамында оңтүстік астананың қоғамдық қауіпсіздігін қамтамасыз етуге атсалысады. Бұл – үлкен сенім, әрі зор жауапкершілік.

Сапқа тұрған ұландарын шығарып салуға келген ата-аналардың да жүзінен толқу мен мақтаныш қатар сезілді.

Шығыс Қазақстаннан аттанған бұл толымды салтанатты түрде шығарып салу – елдік парызға деген құрметтің көрінісі. Жас сарбаздардың алдағы жолы жеңісті, қызметі абыройлы болсын.

Фото: ҚР ҰҰ «Шығыс» өңірлік қолбасшылығы