Өскемен қаласының әкімі Алмат Ақышов қала маңындағы Шмелев Лог кентінің тұрғындарымен кездесіп, тұрғындардың көкейкесті мәселелерін тыңдады, деп хабарлайды Altainews.kz тілшісі.

Кент тұрғындары үшін басты мәселелердің бірі – жол бойындағы су өткізу жүйесінің жоқтығы және қалаға баратын қоғамдық көліктің тапшылығы. Олардың айтуынша, қала орталығына немесе базарларға жету қиын, сондықтан Шмелев Лог – Жібек Жолы көшесі бағытында қосымша автобус жүргізу мәселесін қарастыруды сұрады. Бұл бағытта көтерме-тарату орталығы орналасқандықтан, тұрғындар үшін өте ыңғайлы болар еді. Қала әкімі бұл мәселені бағыттың рентабельділігі тұрғысынан зерттеуді тапсырды.

Кездесуде көшелерді жарықтандыру, балалар ойын алаңын салу және жолдарды асфальттау мәселелері де айтылды. Әкім барлық өтініштердің қаралып, кезең-кезеңімен шешілетінін жеткізді.

Алмат Талғатұлы тұрғындарды жүргізіліп жатқан жұмыстарға бей-жай қарамай, олардың сапасын бақылауға шақырды.

Балалар ойын алаңын салу үшін алдымен тиісті орынды анықтау қажет. Себебі елді мекендегі бос жерлердің басым бөлігі жеке меншікке тиесілі. Әкімдік жер иелерімен келіссөздер жүргізіп, бұл мәселені шешу жолдарын қарастырады.

Фото: Махаббат Ахметжанова

Рилс: Екатерина Скударнова